Uee Dainang Sarge..Nga Use Be Jagal Biang on!!

Ns.B.S - Di sada tingki tepat ari libur, adongma sada keluarga na metmet ala porsukni parngoluon, ia ianakkonna nga tung leleng hian dang heabe mangallang jagal dongan ni indahan mangan.

Di ari i, di bulan Agustus, dung sae masa panen, mauliate situtudo disiala dipasupasu Tuhan Debata do ulaon nasida. Bagak, jala uli do hasil ni panen i.

Ninna si Uccok ma tu itona si Butet, “Dek.., nga tung leleng hian hita dang heabe mangallang jagal ate. Lalapma holanna GuLaMo (ikkan asin) ganup ari, ganup miggu, ganup bulan.”

“Imada ito, ahu pe nga tung mansai tarhirim na mangallang jagal puang. Jala molo boi, dung sae annon hita panen, tor jagal biang ma dituhor Omak ate sian onan. Dissampur dohot sayur kol, tung i nama tabona,” ninna si Butet tu si Uccok ibotona.

Eng..Ing..Eng..

Ujungna, saut do nipini si Butet dohot si Uccok. Tor sibuk do Omakna mangalompa jagal disi ditihor sian onan.

Si Butet dohot si Uccok pe tor ringgas nasida nalaho mangurupi Omakna laho patupahon lompan i.

Dung dipanangkok balanga pangalompaan jagal i tu tataring, hira-hira satonga jom dilompa, nga taranggo be angurni jagal biang i. Si Uccok pe nga lam dang sabar paimahon, huhut ro ijurna nalaho mangallang jagal i.

“Leleng nai dope mak, nga male hian butuhakku bah,” ninna si Uccok tu Omakna.

Ninna Omakna mangalusi si Uccok, “tongkin nai masak nama da Amang, sabar ma ho satongkin nai da.”

Sementara, si Butet dung sae diurupi Omakna i, tor laho do ibana dohot angka dongan satorbangna tu duru marmeam sitengka.

Hampir sajom…, tarbegedo gora-gora sian Omakni tu nasida, ninna, “Butet…hatop i inang mangan nama hita.”

“Olo Omak,” ninna si Butet mangalusi Omakna.

Maringkati do si Butet masuk tu jabu alani lasni rohana sadari i laho mangallang lompan jagal na tabo, jagal biang dissampur sayur kol.

Alani semangatna huhut maringkat masuk tu jabu sian dapur, dang dibereng be dalanna. Gabe tarsenggol patnado balanga na marisi lompan jagal i.

“Kaaarrraapaaaakkk…,” (soara ni balanga marisi lompan jagal biang sarge tu lante simin).

“Uee dainang sarge..nga use be!! Boha nama on Butet dang tarallang hita be jagal on, nga use sude,” ninna Omakna soinama murukna tu si Butet.

Dohot do si Uccok mamuruki itona i si Butet, ala use jagal i. 

“Ima alani ho do i gabe dang manggallang jagal be hita. Di homa i jagal na sarge i,” huhut tangis tariluilu si Uccok.

Ala songoni situasi i, gabe loja do halaki manucci (paiashon) jagal na boi dope dipangan. “Uee..tahe nasib..nasib,” ninna Omakna marsak.

Penulis : Abhotneo Naibaho

Editor   : Tim NsBs